თბილისი, 10 აგვისტო– Sputnik. ჭავჭავაძის გამზირის და კუს ტბის შემაერთებელი საბაგირო გზა, რომელიც შვიდი წელი არ ფუნქციონირებდა, სექტემბრის პირველ ნახევარში გაიხსნება.
ამ ეტაპზე ინტენსიური სარემონტო სამუშაოები მიმდინარეობს: შეიცვალა გამწევი ბაგირი. დამონტაჟდა საბაგირო გზის მართვის თანამედროვე პულტი.სამუშაოების დასრულების მერე ჭავჭავაძის გამზირიდან კუს ტბაზე მოხვედრა 6 წუთში იქნება შესაძლებელი.
თბილისელებს და დედაქალაქის სტუმრებს ორი გონდოლა მოემსახურება, რომლებიც კაპიტალურად გარემონტდა, თუმცა ძველი იერსახე შეუნარჩუნდა. თითო გონდოლით 10-12 ადამიანი შეძლებს მგზავრობას, მათ შორის, ერთი მუდმივი გამცილებელი, იუწყებიან მერიის პრესსამსახურში.
გონდოლები შეზღუდული შესაძლებლობის პირთათვის ადაპტირებული იქნება. ველოსიპედის მოყვარულთათვის კი სპეციალური ველო-საკიდებია დამონტაჟებული.
საბაგირო გზა გახსნამდე სატესტო რეჟიმში იმუშავებს. სექტემბრის პირველ ნახევარში კი ოფიციალურად გაიხსნება და დღის განმავლობაში 2000 მგზავრს მოემსახურება.
საბაგირო ზაფხულის თვეებში დილის 08:00 საათიდან ღამის 00:00 საათამდე იმუშავებს, ზამთარში კი დილის 08:00-0 საათიდან ღამის 10:00 საათამდე.
საბაგირო გზის რეაბილიტაციისთვის დედაქალაქის ბიუჯეტიდან 1 100 000 ლარია გამოყოფილი.
ამჟამად თბილისში რიყის პარკის და ნარიყალას ციხე-სიმაგრის შემაერთებელი საბაგირო გზა ფუნქციონირებს.
