თბილისი, 3 აგვისტო — Sputnik. სუხიშვილების ნაციონალური ბალეტი ბათუმში კონცერტების ტრადიციულ სერია გამართავს — ლეგენდარული ანსამბლის გამოსვლები 16-19 აგვისტოს ჩატარდება.
„სუხიშვილების“ კონცერტები ბათუმის სახელმწიფო მუსიკალური ცენტრის სცენაზე 21:00 საათზე დაიწყება.
როგორც ღონისძიების ორგანიზატორი — საქართველოს კულტურის პალატა აცხადებს, ოთხი დღის განმავლობაში ანსამბლი თავის თაყვანისმცემლებს უამრავ სიურპრიზსა და გრანდიოზულ საღამოებს აჩუქებს.
ანსამბლის გამოსვლის მხარდამჭერები არიან საქართველოს კულტურისა და ძეგლთა დაცვის სამინისტრო და აჭარის მთავრობა.
წლის ბოლოს, დეკემბერში „სუხიშვილები“ გასტროლებზე ბულგარეთსა და იტალიაში მიემგზავრებიან.
70-წლიანი ისტორიის განმავლობაში ანსამბლი გასტროლებით 200-ზე მეტ ტურნეში 90 ქვეყანაში იმყოფებოდა, გამართა დაახლოებით 9500 კონცერტი. საერთაშორისო პრესამ „სუხიშვილები“ „მერვე საოცრებად“ მონათლა.
