თბილისი, 2 აგვისტო — Sputnik. მგლების რაოდენობის რეგულაციის ღონისძიებებს ბოლნისისა და ხობის რაიონულ ადმინისტრაციებში ჩაატარებენ.
უნდა აღინიშნოს, რომ საქართველოში მგლების დახოცვა აკრძალულია. მტაცებელზე ნადირობა ნებადართულია მხოლოდ იმ შემთხვევაში, თუ ის ადამიანის სიცოცხლეს ემუქრება.
ივლისის დასაწყისში მგლებმა თელავის რაიონის სოფელ ბუშეთში 17 ცხვარი დაგლიჯეს. მტაცებლები ცხვრებს დამხმარე მეურნეობაში თავს დაესხნენ, რომელიც ადგილობრივ მცხოვრებს ეკუთვნის. კახეთის რეგიონი არა ერთხელ გამხდარა მგლების შემოსევის ადგილი. ერთ-ერთი ინციდენტი სოფელ ვაზისუბანში მოხდა. მაშინ მტაცებლები შინაური ცხოველების ფარას დაესხნენ.
2011 წელს რუხი მტაცებლების შემოსევისგან დაზარალდა ხობის რაიონის სოფლები. ადგილობრივების თქმით, მაშინ მგლებს თხები, ცხვრები და ცხენი ემსხვერპლა.
ცნობილია, რომ 2012-2015 წლების პერიოდში, გარემოსა და ბუნებრივი რესურსების სამინისტროს ნებართვით, დახოცეს 249 მგელი, 135 ტურა, შვიდი მელია და ოთხი დათვი.
მგლების რაოდენობის რეგულაციის ღონისძიებები ნებადართულია „ადგილობრივი თვითმმართველობის კოდექსის“ კანონის 17 მუხლის საფუძველზე.
