თბილისი, 28 ივლისი — Sputnik. საერთაშორისო კინოფესტივალში, რომელიც აგვისტოში ბოსნია-ჰერცეგოვინას დედაქალაქ სარაევოში ჩატარდება, ქართველი რეჟისორის, სალომე ჯაშის დოკუმენტური ფილმი „დაისის მოზიდულობა“ (THEDAZZLING LIGHT OF SUNSET) მიიღებს მონაწილეობას.
"დაისის მიზიდულობა" საქართველოს და გერმანიის კოპროდუქციაა. იგი რეგიონული სატელევიზიო არხის საშუალებით ერთი პატარა ქალაქის შესახებ მოგვითხრობს, სადაც რიტუალები და ტრადიციები, ნორმები და დოგმები ცხოვრების წესს განსაზღვრავს და სადაც თანამედროვე მსოფლიოს ანარეკლიც იჭრება.
ფილმი ძირითადად წალენჯიხის რაიონშია გადაღებული. იგი საქდოკ ფილმის პროდუქციაა, რომელიც საქართველოს ეროვნული კინოცენტრის, რობერტ ბოშის ფონდის, საქართველოში აშშ-ის საელჩოსა და ფრანგულ-გერმანული საზოგადოებრივი მაუწყებლის "არტეს” მხარდაჭერით შეიქმნა.
ქართველი მაყურებელი სალომე ჯაშს იცნობს ფილმით "ლიდერი ყოველთვის მართალია”. ასევე მისი ფილმი "ბახმარო” რამდენიმე საერთაშორისო კინოფესტივალის პრიზიორია.
ფილმის მსოფლიო პრემიერა შვეიცარიაში, ნიონის საერთაშორისო კინოფესტივალზე შედგა, სადაც მან ფესტივალის მთავარი ჯილდო "The Main Prize of Regard Neuf section" მიიღო.
