თბილისი, 28 ივლისი — Sputnik. პოლიციისთვის წინააღმდეგობის გაწევის გამო პაატა ბურჭულაძის პარტიის „მოძრაობა — სახელმწიფო ხალხისათვის“ წევრი მურაზ სამადაშვილი 600 ლარით დააჯარიმეს, ხოლო კახაბერ დუაძემ თბილისის საქალაქო სასამართლოსგან სიტყვიერი გაფრთხილება მიიღო.
თბილისში 25 ივლისის ღამეს სამადაშვილი და დუაძე პარტიის ერთ-ერთ ოფისთან პოლიციელებთან შეხლა-შემოხლის შემდეგ დააკავეს.
ოფიციალური ვერსიით, პოლიციამ ავტომობილი მძღოლის ალკოჰოლზე შემოწმების მიზნით გააჩერა. ალკოტესტერმა მძღოლის სიმთვრალე არ დაადასტურა, რის შემდეგაც მგზავრებმა — სამადაშვილმა და დუაძემ პოლიციელებს შეურაცხყოფა მიაყენეს.
სამართალდამცველებმა რამდენჯერმე სთხოვეს მგზავრებს დამშვიდება, მაგრამ ბურჭულაძის პარტიის წევრები არ დაემორჩილნენ მათ მოთხოვნას, რის გამოც საბოლოოდ დააკავეს პოლიციისთვის წინააღმდეგობის გაწევის მუხლით.
მოგვიანებით შემთხვევის ამსახველი ვიდეოკადრები ინტერნეტითაც გავრცელდა, სადაც ჩანს, როგორ აყენებენ სამადაშვილი და დუაძე შეურაცხყოფას პოლიციელებს.
პარტიამ „მოძრაობა — სახელმწიფო ხალხისათვის“ მომხდარში პოლიცია დაადანაშაულა და განაცხადა, რომ მათი თანაპარტიელები იძულებით გადაიყვანეს მანქანიდან, სცემეს და ამის შემდეგ დააკავეს.
