თბილისი, 25 ივლისი — Sputnik. თურქეთის პროკურატურამ, ქვეყანაში სამხედრო გადატრიალების მცდელობის საქმესთან დაკავშირებით, 42 ჟურნალისტის დაკავების ორდერი გასცა, იუწყება საინფორმაციო სააგენტო „რია ნოვოსტი“ თურქულ ტელეარხ NTV-ზე დაყრდნობით.
ამჟამად ქვეყანაში გრძელდება ოპოზიციონერ ისლამისტ სასულიერო პირთან ფეთჰულა გიულენთან კავშირში ეჭვმიტანილი ჟურნალისტების ძებნისა და დაკავების ოპერაცია. ოფიციალური ანკარა სწორედ გიულენს ადანაშაულებს თურქეთში სახელმწიფო გადატრიალების მცდელობის ორგანიზებაში.
15-16 ივლისის ღამით სამხედრო მეამბოხეთა ჯგუფმა თურქეთში სახელმწიფო გადატრიალების მოწყობა სცადა, რაც ხელისუფლებამ აღკვეთა. ბოლო მონაცემებით, სტამბულსა და ანკარაში შეტაკებებისას, სამხედროების გარდა, 246 მშვიდობიანი მოქალაქე დაიღუპა, ხოლო 2 ათასამდე კაცი დაშავდა.
