თბილისი, 22 ივლისი – Sputnik. თურქეთის მოქალაქე სოფელ აგარაში დააკავეს. პირადი ჩხრეკისას მას 49,73 გრამი ჰეროინი აღმოაჩნდა, აღნიშნულია საქართველოს შინაგან საქმეთა სამინისტროს ვებ-გვერდზე გამოქვეყნებულ განცხადებაში.
დაკავებულს 8-დან 20 წლამდე ან უვადო პატიმრობა ემუქრება (საქართველოს სსკ-ის 260-ე მუხლის მე-6 ნაწილის „ა“ ქვეპუნქტით), რადგან საქმე დიდი ოდენობის ნარკოტიკს ეხება.
წლის დასაწყისიდან ეს თურქეთის უკვე მესამე მოქალაქეა, რომელიც საქართველოში ნარკოტიკის გამო დააკავეს.
მარტში ბათუმში თურქეთის მოქალაქეს 49 აბი „ექსტაზი“ და 1,4 გრამი მარიხუანა აღმოაჩნდა. მეორედ თურქეთის მოქალაქე დააკავეს სარფის გამშვებ პუნქტზე, მაშინ პოლიციამ ამოიღო 0,14 გრამი კოკაინი და 10 აბი, რომლებიც 1,9 გრამ MDMA-ს შეიცავდა.
