თბილისი, 17 ივლისი – Sputnik. ერევანში კვირას დილით შეიარაღებული ადამიანების მიერ პოლიციის შენობის აღების დროს ერთი პოლიციელი დაიღუპა, ორი – დაიჭრა, იუწყება „Sputnik სომხეთი“ ეროვნული უშიშროების სამსახურის ინფორმაციაზე დაყრდნობით.
„ერთი პოლიციელი დაიღუპა, ორი დაჭრილია“, – იუწყება უშიშროების სამსახური.
განცხადებაში აღნიშნულია, რომ სპეცდანიშნულების ქვედანაყოფების მიერ შენობის აღების შედეგად ორი მძევალი გათავისუფლებულია.
„სამართალდამცველი ორგანოები ვითარებას აკონტროლებენ და საბოლოო შედეგისთვის აუცილებელ ზომებს მიმართავენ“, – აღნიშნულია სომხეთის ეროვნული უშიშროების სამსახურის განცხადებაში.
კვირას დილით ერევნის გარეუბანში, ერებუნის რაიონში შეაიარაღებული პირების ჯგუფმა პოლიციის განყოფილების შენობა აიღო. ისინი ყარაბაღის კონფლიქტის მონაწილე, საზოგადოებრივი ხსნის რადიკალური ოპოზიციური ფრონტის „ახალი სომხეთის“ ლიდერის ჟირაირ სეფილიანის გათავისუფლებას მოითხოვენ, რომელსაც იარაღის უკანონო შეძენა–შენახვა ედება ბრალად.