თბილისი, 7 ივლისი — Sputnik. არაბულმა ავიაკომპანიამ “Air Arabia” დუბაი-ბათუმი-დუბაის მიმართულებით პირველი რეისი განახორციელა, ნათქვამია TAV Georgia-ს განცხადებაში.
პირდაპირი ფრენები 30 სექტემბრის ჩათვლით კვირაში ორჯერ, ხუთშაბათს და შაბათს შესრულდება. საზაფხულო სეზონის პიკზე იგეგმება ფრენების სიხშირის ორჯერ გაზრდა — კვირაში ოთხჯერ. ფრენები A-320 ტიპის ავიახომალდით განხორციელდება.
არაბული ავიაკომპანია თბილისის საერთაშორისო აეროპორტში რეისებს 2014 წლის ოქტომბრიდან ახორციელებს.
მცირებიუჯეტიანი ავიაკომპანია Air Arabia 2003 წელს შეიქმნა. ამჟამად ის 26 ავიახომალდით 100-ზე მეტი მიმართულებით ფრენებს ასრულებს.
2005 წლის 1 ნოემბრიდან თბილისის საერთაშორისო აეროპორტი 22 წლის ვადით TAV-URBAN Georgia LLC-ის მართველობაში გადავიდა, ბათუმის აეროპორტი კი 20 წლის ვადით.
ბათუმის საერთაშორისო აეროპორტი ქალაქიდან 2 კილომეტრში მდებარეობს. შიდა და საერთაშორისო რეისების მომსახურების გარდა, აეროპორტი ასევე თურქეთის ჩრდილო-აღმოსავლეთ რეგიონებში ადგილობრივ ავიაფრენებს ემსახურება.
თბილისისა და ბათუმის საერთაშორისო აეროპორტებში TAV Holding-მა უკვე 100 მილიონ დოლარზე მეტი დააბანდა.
