თბილისი, 29 ივნისი — Sputnik. თურქული მხარე ამ ეტაპზე დაღუპულთა და დაშავებულთა შორის საქართველოს მოქალაქეების არსებობას არ ადასტურებს, იუწყება საქართველოს საგარეო საქმეთა სამინისტრო.
სტამბულში საქართველოს გენერალური საკონსულო მუდმივ კავშირზეა თურქეთის საგანგებო სიტუაციებზე პირველადი რეაგირების ჯგუფთან. საქართველოს გენერალურ საკონსულოში ასევე მოქმედებს ცხელი ხაზი: (+90 541) 818 44 00, ნათქვამია უწყების ცნობაში.
ტელეკომპანია „რუსთავი 2“-ის ინფორმაციით, აფეთქების დროს აეროპორტში საქართველოს მოქალაქეები იმყოფებოდნენ, რომელთაც მოგვიანებით გენერალური კონსული შეხვდა. ისინი სასტუმროებში გადაანაწილეს.
აფეთქებებს, რომლებიც სტამბულის ათათურქის აეროპორტის საერთაშორისო ტერმინალში 28 ივნისს, 22:15 საათზე მოხდა, 36 ადამიანის სიცოცხლე ემსხვერპლა. კიდევ 147 დაიჭრა.
