თბილისი, 28 ივნისი — Sputnik. საქართველოს პრეზიდენტი გიორგი მარგველაშვილი 29 ივნისს ორდღიანი ოფიციალური ვიზიტით გერმანიას ეწვევა, აღნიშნულია პრეზიდენტის პრეს-სამსახურის განცხადებაში.
ვიზიტის ფარგლებში მარგველაშვილი შეხვდება გერმანიის პრეზიდენტს იოახიმ გაუკს, რის შემდეგაც სახელმწიფოს მეთაურების ერთობლივი პრესკონფერენციაა დაგეგმილი.
საქართველოს პრეზიდენტი ასევე შეხვდება გერმანიის კანცლერს ანგელა მერკელს. დაგეგმილია მარგველაშვილის შეხვედრები გერმანიის პარლამენტის ორივე პალატაში.
მარგველაშვილი ასევე სიტყვით გამოვა კონრად ადენაუერის ფონდში და სტუმრების კითხვებს უპასუხებს.
ოფიციალური ვიზიტი 30 ივნისს დასრულდება.
სახელმწიფოებს შორის დიპლომატიური ურთიერთობები 1992 წლის 13 აპრილს დამყარდა. გარდა ამისა, 2017 წელს საქართველოში გერმანული მოსახლეობის ორასი წლისთავი აღინიშნება.
