თბილისი, 28 ივნისი — Sputnik. თბილისში ორდღიანი საერთაშორისო კონფერენცია გაიხსნა, რომელიც მეცნიერების, ტექნოლოგიებისა და ინოვაციების განვითარებას ეძღვნება და აღმოსავლეთ პარტნიორობის ქვეყნების რეგიონული პლატფორმის შექმნაზეა მიმართული.
კონფერენციაში, რომელიც საქართველოს განათლებისა და მეცნიერების მინისტრმა ალექსანდრე ჯეჯელავამ გახსნა, მონაწილეობენ სპეციალისტები უკრაინიდან, მოლდოვიდან, ბელარუსიდან, სომხეთიდან, აზერბაიჯანიდან და საქართველოდან.
„განვითარებადი ქვეყნებისთვის ინვესტიციები მეცნიერებაში, ტექნოლოგიებსა და ინოვაციებში ძალზე მნიშვნელოვანია… ეს პლატფორმა განკუთვნილია, რომ ობიექტურად შეფასდეს (პროექტები) არა მარტო დაფინანსებამდე, არამედ ფაქტობრივი სამუშაოს შესრულების შემდეგაც“, — განაცხადა ჯეჯელავამ.
კონფერენციის მონაწილეები განიხილავენ სამეცნიერო — კვლევითი პროექტების შემფასებელ ექსპერტთა საერთო რეგიონული პლატფორმის მომზადებისა და ფუნქციონირების საკითხებს.
ღონისძიების ფარგლებში მხარეებმა შესაბამის მემორანდუმს მოაწერეს ხელი.
