თბილისი, 20 ივნისი – Sputnik. ცენტრალური აფრიკის რესპუბლიკაში საქართველოს საგამოძიებო ჯგუფმა, რომელიც რვა წევრისგან შედგებოდა, დაგეგმილი საგამოძიებო მოქმედებები დაასრულა, რომელიც ქართველი ჯარისკაცების მცირეწლოვანებზე შესაძლო ძალადობის ფაქტების შესწავლას ისახავდა მიზნად, იუწყება თავდაცვის სამინისტრო.
2016 წლის იანვარში გაეროს ადამიანის უფლებათა უმაღლესმა კომისარმა ზეიდრაად ალ ჰუსეინმა გაავრცელა ინფორმაცია იმის შესახებ, რომ დაზარალებულებმა ჯერ კიდევ 2014 წელს უამბეს გაეროს წარმომადგენლებს უცხოელი სამხედრო მოსამსახურეების მიერ გაუპატიურების ფაქტებზე, რომელთაგან სამმა ქართველ ჯარისკაცებს დაადო ხელი.
6 ივნისიდან ქართულმა საგამოძიებო ჯგუფმა ადგილობრივი გამომძიებლების, ადვოკატებისა და არასამთავრობო სექტორის წარმომადგენლების თანდასწრებით დაზარალებულები დაკითხეს. დაკითხვის პროცესი სამი დღე გრძელდებოდა, რომლის შემდეგაც მხარეებმა ფოტოსურათებით ამოცნობისა და სავარაუდო დაზარალებულების ჩვენების ადგილზე შემოწმების პროცედურები ჩაატარეს.
საგამოძიებო ჯგუფი სამხედრო პოლიციის, გენერალური ინსპექციის, ფსიქოლოგიური შეჩევისა და მონიტორინგის დეპარტამენტისა და თავდაცვის სამინისტროს ევროატლანტიკურ სტრუქტურებში ინტეგრაციის დეპარტამენტის წარმომადგენლებით იყო დაკომპლექტებული.
სპეციალისტები საქართველოში დაბრუნების შემდეგაც გააგრძელებენ გამოძიებას.
გამოძიების ჩატარებისთვის ქართული მხარე ცენტრალური აფრიკის რესპუბლიკის გენერალურ პროკურორ გრისლენ გეზენგეს შეუთანხმდა.
ქართველი სამხედრო მოსამსახურეები ცენტრალური აფრიკის რესპუბლიკაში ევროკავშირის ეგიდით წარმოებულ სამშვიდობო მისიაში 2014 წლის შუა პერიოდიდან მონაწილეობენ. დღევანდელი მდგომარეობით, ცენტრალური აფრიკის რესპუბლიკაში ხუთი სამხედრო მსახურობს, რომლებიც სამშვიდობო მისიის შემადგენლობაში შედიან.
ცენტრალური აფრიკის რესპუბლიკაში უცხოელი სამხედროების მიერ არასრულწლოვანთა მიმართ სავარაუდო სექსუალური ძალადობის ფაქტზე გამოძიება საქართველოში გაგრძელდება და გადაწყვეტილება კანონის შესაბამისად მიიღება.
