თბილისი, 15 ივნისი – Sputnik. პორტუგალიისა და ისლანდიის ფეხბურთელები საფრანგეთში მიმდინარე ევროპის ჩემპიონატის ჯგუფური ეტაპის მატჩში ერთმანეთს მშვიდობიანად დაშორდნენ.
F ჯგუფის პირველი ტურის შეხვედრა, რომელიც სამშაბათს სენტ–ეტიენში გაიმართა, საყაიმო ანგარიშით 1:1 დასრულდა. პორტუგალიელი ნანის გოლს (31–ე წთ) ისლანდიელმა ბირკირ ბიარნასონმა ზუსტი დარტყმით უპასუხა (50–ე წთ).
მატჩის დაწყებამდე ორი საათით ადრე ცრუ განგაშის გამო მაყურებელი სტადიონიდან ცოტა ხნით გამოიყვანეს. სტადიონის სწრაფი შემოწმების შემდეგ გულშემატკივარი ტრიბუნებს დაუბრუნდა.
ამ ჯგუფის შემდეგ მატჩში 18 ივნისს პორტუგალიელები პარიზში ავსტრიელებს დაუპირისპირდებიან, ხოლო ისლანდიელები ამავე დღეს მარსელში – უნგრელებს.
