თბილისი, 9 ივნისი — Sputnik. ნატოს ვარშავის სამიტზე საქართველო მკაფიო გადაწყვეტილებებს ელოდება ქვეყნის ალიანსში ინტეგრაციის თაობაზე, განაცხადა საგარეო საქმეთა მინისტრმა მიხეილ ჯანელიძემ ვაშინგტონში.
მიხეილ ჯანელიძემ მონაწილეობა მიიღო ჩრდილოატლანტიკური ალიანსის კონფერენციაში „ნატოს სამომავლო გაფართოება და ევროპული უსაფრთხოების ახალი მიჯნები“.
„საქართველო ელოდება კიდევ უფრო მკაფიო სიგნალს ქვეყნის ალიანსში გაწევრიანების შეუქცევადობის თვალსაზრისით და ასევე პრაქტიკული თანამშრომლობის გაღრმავებას საქართველოს თავდაცვისუნარიანობისა და უსაფრთხოების განმტკიცების მიმართულებით“, — განაცხადა საგარეო საქმეთა მინისტრმა.
მისი თქმით, საქართველო სამაგალითო გახდა რეგიონში ინსტიტუციონალური რეფორმების მხრივ.
საქართველო ნატოს ვარშავის სამიტისგან ქვეყნის თავდაცვისუნარიანობის გაზრდასა და ნატო–საქართველოს ურთიერთობებში ახალ დადებით ასპექტებს ელოდება.
