თბილისი, 3 ივნისი – Sputnik. იუსტიციის უმაღლესი საბჭოს მდივანმა ლევან მურუსიძემ მოსამართლე ნათია გუჯაბიძესთან დაკავშირებით კომენტარი გააკეთა, რომელიც სააპელაციო სასამართლოში ტელეკომპანია „რუსთავი 2“-ის საქმეს იხილავს.
შეგახსენებთ: ტელეკომპანიის გენერალურმა დირექტორმა ნიკა გვარამიამ მოსამართლე ნათია გუჯაბიძეს სახელმწიფო სახსრების გაფლანგვაში დასდო ბრალი. გვარამიას განცხადებით, ამის შესახებ ინფორმაცია ჰქონდა იუსტიციის უმაღლეს საბჭოსაც, რომელიც საქმის შესწავლას შეუდგა, თუმცა, მასალები პროკურატურას არ გადასცა და მხოლოდ სარეკომენდაციო ბარათით შემოიფარგლა.
„არც სარეკომენდაციო და არც დისციპლინური რაიმე სახდელი გუჯაბიძის მიმართ, საბჭოს მიერ არ გამოყენებულა,“ — განაცხადა ლევან მურუსიძემ ტელეკომპანია „რუსთავი 2“ — ის ეთერში.
მანამდე, მთავარმა პროკურატურამ გვარამიას განცხადებები უარყო და მას უწყების დისკრედიტაციასა და საზოგადოების შეცდომაში შეყვანის მცდელობაში დასდო ბრალი.
გვარამიას მტკიცებით, 2014 წელს გუჯაბიძემ თბილისში საცხოვრებელი ბინის დასაქირავებლად სახელმწიფოსგან თანხა მიიღო, სინამდვილეში კი აღნიშნული ბინა ნათია გუჯაბიძის დედას ეკუთვნოდა.
ნათია გუჯაბიძეს ბრალდებასთან დაკავშირებით ამ დრომდე არ გაუკეთებია განმარტებები.
