თბილისიმ 2 ივნისი — Sputnik. „არ დაიჭირო“ — ამ ლოზუნგით მიმდინარეობდა აქცია-კონცერტი მთავრობის კანცელარიასთან თბილისში, რომელშიც 14 არასამთავრობო ორგანიზაცია მონაწილეობდა ნარკოტიკების დეკრიმინალიზაციის მოთხოვნით.
ანალოგიური მოთხოვნით აქციები გაიმართა ქვეყნის სხვა მსხვილ ქალაქებშიც — ბათუმში, ქუთაისსა და რუსთავში.
„დღეს ჩვენ შევიკრიბეთ, რათა პროტესტი გამოვხატოთ ქვეყანაში არსებული ნარკოპოლიტიკის წინააღმდეგ. ჩვენი მთავარი მოთხოვნაა, რომ ადამიანებს ციხეში არ სვამდნენ ნარკოტიკების მოხმარებისათვის. ჩვენ მოვითხოვთ დეკრიმინალიზაციას“, — თქვა აქციის ერთ-ერთმა ორგანიზატორმა, მოძრაობა „ორიონის“ წარმომადგენელმა ლექსო მაჭავარიანმა.
აქციის ორგანიზატორები ითხოვენ სისხლის სამართლისა და ადმინისტრაციული სასჯელის გაუქმებას პირადი მოხმარებისათვის მცირე დოზით ყველა ტიპის ნარკოტიკების შეძენა-შენახვაზე, ასევე პირადი მოხმარებისათვის კანაფის ჯიშების მცირე რაოდენობით კულტივირებაზე.
გარდა ამისა აქციის მონაწილენი ითხოვენ — იძულებითი ნარკოტესტირების პრაქტიკის გაუქმებას.
„ოპოზიციური პარტიის „ახალი პოლიტიკური ცენტრი — გირჩის“ წევრმა დეპუტატმა გოგა ხაჩიძემ მარიხუანასა და კანაფის დეკრიმინილიზაციაზე შეიტანა საკანონმდელო ინიციატივა პარლამენტში, თუმცა სხვა დეპუტატებმა მხარი არ დაუჭირეს კოლეგას.
საქართველოში ყოველ 10 ათას კაცზე 29 ნარკომანი მოდის. ოფიციალური მონაცემებით, მათგან მხოლოდ მცირე ნაწილი გადის მკურნალობას.
ნარკომანია საქართველოში უფრო გავრცელებულია 25-45 წლის მამაკაცებში. ყველაზე გავრცელებული ნარკოტიკი მარიხუანაა. შსს-ს მონაცემებით, მისი მომხმარებელია ნარკომანთა 63.9%.
