თბილისი, 25 მაისი — Sputnik. საქართველოს დამოუკიდებლობის დღისადმი მიძღვნილ ღონისძიებებთან დაკავშირებით, თბილისის ცენტრში ტრანსპორტის მოძრაობაზე შეზღუდვა დაწესდა, აღნიშნულია შსს-ს ვებგვერდზე განთავსებულ განცხადებაში.
25 მაისს, 00:30 საათიდან მთლიანად გადაიკეტა თავისუფლების მოედანი, რუსთაველის გამზირი და ვარდების მოედანი.
ტრანსპორტის მოძრაობა აკრძალულია ასევე რუსთაველის გამზირის მიმდებარე ალექსანდრე ჭავჭავაძის, მიტროფანე ლაღიძის, ბესიკის, ლესია უკრაინკას, ჭიჭინაძის, 9 აპრილის, ფურცელაძის, უსახელოს, ჯორჯაძის, ჭანტურიასა და მესხიას ქუჩებზე.
შს სამინისტრო ღონისძიების მიმდინარეობისას, მძღოლებს ალტერნატიულ გზებს სთავაზობს — თაბუკაშვილისა და ჭონქაძის ქუჩებით მოძრაობას.
ტრანსპორტის მოძრაობა ჩვეულ რეჟიმში 27 მაისს, 12:00 საათზე აღდგება.
