თბილისი, 16 თებერვალი — Sputnik. საქართველოს შეიარაღებულ ძალებს მალე საკუთარი სამხედრო მარში ექნებათ. ამისათვის თავდაცვის სამინისტრომ კონკურსი გამოაცხადა. გამარჯვებული კომპოზიცია ქვეყნის დამოუკიდებლობის დღეს, 26 მაისს აჟღერდება.
აქამდე საქართველოს ეროვნული გვარდიის სამხედრო-სასულე ორკესტრი ოფიციალურ შეხვედრებზე სხვა ქვეყნების მარშებს ასრულებდა.
თავდაცვის სამინისტრო განმარტავს, რომ დამოუკიდებელი რესპუბლიკის დროს, 1918-21 წლებში, ქუთაისში შექმნილი პირველი სამხედრო-სასულე ორკესტრი მოგვიანებით საბჭოთა სამხედრო ორკესტრად გარდაიქმნა. შესაბამისად, ქართული სასულე მუსიკა ვეღარ განვითარდა და სწორედ ამიტომ უწევს დღეს ეროვნული გვარდიის სამხედრო-საჩვენებელ ორკესტრს ოფიციალური შეხვედრებისას სხვა ქვეყნების სამხედრო მარშების შესრულება.
კონკურსი ორ ეტაპად ჩატარდება. ჟიური თავდაპირველად ყველა ნამუშევარს გაეცნობა, შემდეგ კი, 30 აპრილისთვის, ხუთ საუკეთესო კომპოზიციას შეარჩევს.
კონკურსის მხარდამჭერია საქართველოს პრეზიდენტის ფონდი.
