თბილისი, 24 მაისი — Sputnik. საქართველოს ერთ-ერთი უმსხვილესი ბანკი სოციალურად დაუცველი ოჯახებიდან აბიტურიენტთა ზოგადი უნარების გამოცდისათვის ონლაინ მომზდებას დააფინანსებს.
„ნებულას“ საგანმანათლებლო ონლაინ-პლატფორმაზე არსებული ზოგადი უნარების მომზადების სრული კურსის ღირებულება 100 ლარს შეადგენს (დაახლ. 46 დოლარი).
სოციალურად დაუცველი ოჯახებიდან აბიტურიენტთა რეგისტრაცია 24 მაისს დაიწყება და 1 სექტემბრამდე გაგრძელდება nebula.ge საიტზე. ამგვარად ისინი მომავალი ერთიანი ეროვნული გამოცდებისათვის მომზადებას შეძლებენ.
საქართველოში 38 ათასი აბიტურიენტიდან დაახლოებით 7 ათასი — სოციალურად დაუცველი ოჯახიდან არის.
წელს საქართველოში ერთიანი ეროვნული გამოცდები, რომლებიც საქართველოს უმაღლესებში ჩასაბარებლად არის საჭირო, 1 ივლისს დაიწყება.
ერთიან ეროვნულ გამოცდებში მონაწილეობაზე რეგისტრაცია 41,5 ათასზე მეტმა ადამიანმა გაიარა. იმისთვის, რომ აბიტურიენტი სტუდენტი გახდეს, აუცილებელია სამი სავალდებულო საგნის — ზოგადი უნარების, ქართული ენისა და ლიტერატურის და უცხო ენის, ასევე ერთი დამატებითი გამოცდის წარმატებით ჩაბარება.
