თბილისი, 24 მაისი — Sputnik. საქართველოს შსს აფხაზეთის ადმინისტრაციულ საზღვართან ვითარებას აკონტროლებს, განუცხადა უწყების მინისტრმა გიორგი მღებრიშვილმა ჟურნალისტებს.
საქართველოს მოქალაქე გიგა ოთხოზორია სოფელ ხურჩაში 19 მაისს სასიკვდილოდ დაჭრეს. ქვეყნის მთავარმა პროკურატურამ ბრალდება აფხაზეთის დე-ფაქტო სასაზღვრო სამსახურის წარმომადგენელს რაშიდ კანჯიოღლის წარუდგინა.
„მსგავსი ცინიზმითა და სისასტიკით ჩადენილი დანაშაული და ასეთი მუხანათური მკვლელობა დაუსჯელი ნამდვილად არ დარჩება და დამნაშავე ნამდვილად დაისჯება. გამოძიება ინტენსიურად მიმდინარეობს. გამოძიების ინტერესებიდან გამომდინარე, დეტალებზე ვერ მოგახსენებთ. ადმინისტრაციულ საზღვრებს აფხაზეთისა და სამხრეთ ოსეთის ტერიტორიაზე აკონტროლებს შინაგან საქმეთა სამინისტროს განსაკუთრებულ დავალებათა დეპარტამენტი. ასე რომ, იქიდან რამე საფრთხეები მოსალოდნელი არ არის“, — განაცხადა მღებრიშვილმა.
საქართველოს საგარეო საქმეთა სამინისტრომ მომხდარზე პასუხისმგებლობა რუსულ მხარეს დააკისრა. რუსეთის საგარეო საქმეთა სამინისტროში განაცხადეს, რომ რუსულ მხარეს ამასთან საერთო არაფერი აქვს.
საგარეო უწყებამ მომხდარის შესახებ აცნობა ევროკავშირის სადამკვირვებლო მისიასა და ჟენევის მოლაპარაკებების თანათავმჯდომარეებს და მათგან შესაბამისი რეაგირება მოითხოვა.
