თბილისი, 23 მაისი — Sputnik. საქართველოსა და აზერბაიჯანის პოლიციის რაიონული სამმართველოების ხელმძღვანელები წელიწადში ერთხელ ერთობლივ სამუშაო შეხვედრებს გამართავენ.
შეთანხმებას ამის შესახებ საქართველოს შინაგან საქმეთა მინისტრის პირველი მოადგილის ბესიკ ამირანაშვილის აზერბაიჯანში ვიზიტის დროს მიაღწიეს.
საქართველოს შსს-ს მონაცემებით, პირველ შეხვედრას მიმდინარე წლის ივნისში საქართველო უმასპინძლებს. ის ყოველ წელს როტაციის პრინციპით ჩატარდება. შეხვედრებზე იმსჯელებენ კრიმინალთან ერთობლივი ბრძოლისა და ტრანსსასაზღვრო დანაშაულის პრევენციის საკითხებზე.
გარდა ამისა, ამ სამუშაო შეხვედრებში ორი ქვეყნის შინაგან საქმეთა მინისტრების მონაწილეობის შესაძლებლობაც განიხილება.
შინაგან საქმეთა მინისტრის პირველი მოადგილე ბესიკ ამირანაშვილი ბაქოში აზერბაიჯანის შინაგან საქმეთა მინისტრს რამილ უსუბოვს და მინისტრის პირველ მოადგილეს ვილაეტ ეივაზოვს შეხვდა.
ეს საქართველოსა და აზერბაიჯანის ძალოვან უწყებებს შორის თანამშრომლობის პირველი შეთანხმება არ არის. რამდენიმე დღის წინ აზერბაიჯანის ქალაქ გაბალაში საქართველოს, აზერბაიჯანისა და თურქეთის თავდაცვის მინისტრები ერთობლივი სამხედრო წვრთნების ჩატარებაზე შეთანხმდნენ.
წვრთნების ჩატარების ზუსტი თარიღი და ფორმატი ჯერჯერობით უცნობია.
