თბილისი, 20 მაისი — Sputnik. ევროკავშირი და გაეროს განვითარების პროგრამა, საპარლამენტო არჩევნების წინ და შემდგომ პერიოდში, დაბალანსების, მიუკერძოებლობისა და პროფესიონალიზმის კუთხით, მედიის მუშაობის შემოწმებას იწყებენ.
მონიტორინგის ობიექტი საქართველოს 40-ზე მეტი მედიასაშუალება გახდა.
ქვეყანაში საპარლამენტო არჩევნები 8 ოქტომბერს ჩატარდება.
„სრულებით ლოგიკურია, გვქონდეს მკაფიო სურათი იმის შესახებ, თუ როგორ მუშაობს მედია არჩევნების პერიოდში. თავისუფალ და ხარისხიან მედიას გადამწყვეტი მნიშვნელობა აქვს“, — განაცხადა ევროკავშირის ელჩმა საქართველოში იანოშ ჰერმანმა ტელეკომპანია „რუსთავი 2“-ის ეთერში.
ევროკავშირის წარმომადგენელმა საქართველოში გატარებული რეფორმები დადებითად შეაფასა.
„ჩვენ ვაფასებთ ბოლო წლებში საქართველოს მიღწევებს დემოკრატიული სტანდარტების გაუმჯობესების, რეფორმების ჩატარების, კანონის უზენაესობის გაძლიერებისა და მედიის თავისუფლების მხრივ“, — აღნიშნა ჰერმანმა.
მონიტორინგს, რომელიც ნოემბრამდე გაგრძელდება, სამი ორგანიზაცია ჩაატარებს. „ჟურნალისტური ეთიკის ქარტია“ ტელეკომპანიების მუშაობას დააკვირდება, „ინტერნიუს-საქართველო“ — რადიოს, ხოლო „სამოქალაქო განვითარების ინსტიტუტი“ — ონლაინ და ბეჭდვით მედიას.
მონიტორინგის შედეგები ვებგვერდზე mediamonitor.ge გამოქვეყნდება.
