თბილისი, 14 მაისი — Sputnik. საქართველოს პარლამენტის დეპუტატები გუშინ, გვიან საღამოს შეიკრიბნენ სესიაზე, რომელიც ხმაურიანი და შეურაცხმყოფელი ტექსტებით გაჯერებული გამოდგა.
სესიის შემდეგ ბიუროს სხდომა ჩაინიშნა, რასაც საპარლამენტო უმრავლესობასა და ოპოზიციას შორის დაპირისპირება მოჰყვა.
„თქვენ გინდათ ისეთი რეჟიმის დამყარება ქვეყანაში, სადაც ბიძინა ივანიშვილი იქნება ქვეყნის მეთაურიც, საკონსტიტუციო სასამართლოს თავმჯდომარეც“, — მიმართა „ნაციონალური მოძრაობის“ დეპუტატმა ჩიორა თაქთაქიშვილმა უმრავლესობის წევრებს.
ნაცმოძრაობის წარმომადგენლებს ვერ გაეგოთ, რატომ შეიკრიბა სესია გვიან საღამოს და გაცხარებით მოითხოვდნენ პასუხს კითხვაზე, რასაც ხმამაღალი რეპლიკები მოჰყვა.
უმრავლესობის დეპუტატმა გია ჟორჟოლიანმა ყოფილი მმართველი პარტიის წევრებს „მავნებლები“ უწოდა და არც მაგიდაზე მუშტის ბრაგუნი დაიშურა.
„თქვენ ამდენი ხნის განმავლობაში ეწეოდით მავნებლობას და გინდათ ეს გააგრძელოთ. არ გაგაგრძელებინებთ! კენჭისყრას ჩავატარებთ და მივიღებთ კანონებს… თქვენ უფსკრულში მიგყავდათ ქვეყანა და თქვენ წახვალთ უფსკრულში“, — ყვირილით მიმართა მან „ერთიანი ნაციონალური მოძრაობის“ წევრებს.
თანაც იმისთვის, რომ ოპოზიციის წარმომადგენლები გაეჩუმებინა, ჟორჟოლიანმა რამდენჯერმე გამოიყენა სიტყვა „მოკეტე“, მათ შორის, ქალბატონი „ნაციონალების“ მიმართ.
პარლამენტის თავმჯდომარის, დავით უსუფაშვილის მცდელობა, წესრიგი დაემყარებინა და კორექტული მსჯელობის ფარგლებში გადაეყვანა სხდომა, უშედეგო გამოდგა.
