თბილისი, 6 მაისი — Sputnik. ყაზბეგი-ზემო ლარსის გამშვებ პუნქტთან ახლოს საევაკუაციო დერეფნის მშენებლობა 2016 წელს დასრულდება, განაცხადეს საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტში.
საბაჟო-გამშვები პუნქტი მაღალ მთაში მდებარეობს და ზამთრის პერიოდში ეს გზა ლიპყინულისა და ზვავსაშიშროების გამო ხშირად იკეტება.
„მსგავსი პროექტი საქართველოში პირველად ხორციელდება. სტიქიის შემთხვევაში საევაკუაციო დერეფანი უზრუნველყოფს მცხეთა-სტეფანწმინდა-ლარსის სავატომობილო გზით მოსარგებლე ადამიანების, საბაჟო-გამშვები პუნქტისა და მიმდებარე მშენებარე ობიექტებზე დასაქმებულთა უსაფრთხო გადაადგილებას სტიქიის ზონიდან ევაკუაციის ადგილამდე”, — აღნიშნულია დეპარტამენტის ვებ-გვერდზე განთავსებულ განცხადებაში.
საევაკუაციო დერეფანი 208,8 მეტრი სიგრძისა და 2,25 მეტრი სიგანის იქნება.
ამ დროისთვის ობიექტზე კლდეში რიგელების განთავსება დასრულდა და დაიწყო ბილიკზე ბეტონის საფარის მოწყობის სამუშაოები. აღნიშნული სამუშაოების დასრულების შემდეგ მოეწყობა ბურჯები და კიბის უჯრედები.
პროექტის ღირებულება 1,2 მლნ ლარია.
