თბილისი, 5 მაისი — Sputnik. ქართველმა მოფარიკავეებმა ევროპის ახალგაზრდულ ჩემპიონატზე, რომელიც ბულგარეთის ქალაქ პლოვდივში გაიმართა, ვერცხლის მედლები მოიპოვეს, იტყობინება სპორტისა და ახალგაზრდობის სამინისტროს ოფიციალური გვერდი.
ახალგაზრდა ქართველმა მოფარიკავეებმა გუნდური შეჯიბრის ფინალში იასპარეზეს, სადაც რუსეთის ნაკრებთან დამარცხდნენ 38:45.
ფინალში გასვლამდე, საქართველოს ახალგაზრდული ნაკრების წევრებმა ნახევარფინალში ბელარუსს სძლიეს 45:42, მანამდე კი უკრაინა 45:38, ჩემპიონატის ფავორიტი, პირველ ნომრად განთესილი იტალია კი 45:42 დაამარცხეს.
ევროპის ახალგაზრდულ ჩემპიონატზე ინდივიდუალურ ჩათვლაში ჩემპიონობა სანდრო ბაზაძემ მოიპოვა.
ახალგაზრდა მოფარიკავეები თბილისში 5 მაისს დაბრუნდებიან.
