თბილისი, 26 აპრილი — Sputnik. პირველად თბილისში 27-30 აპრილს მსოფლიო ფსიქიატრიული ასოციაციის (WPA) რეგიონული კონფერენცია გაიმართება, განუცხადეს Sputnik-ს ღონისძიების ორგანიზატორებმა.
კონფერენციის მიზანია ფსიქიკური ჯანდაცვის სისტემის გამოწვევების განსაზღვრა, პაციენტების უფლებების დაცვა და ფსიქოსოციალური რეაბილიტაციის კუთხით მომსახურების განვითარების ხელშეწყობა.
კონფერენციას მსოფლიოს 30 ქვეყნის დაახლოებით 400 დელეგატი დაესწრება.
სტუმრებს შორის იქნება WPA-ს პრეზიდენტიც, პროფესორი დინეშ ბუგრა, ასევე ღონისძიებას დაესწრებიან ფსიქიატრიის სფეროს მსოფლიოში აღიარებული ექსპერტები.
როგორც ორგანიზატორები აღნიშნავენ, კონფერენცია ხელს შეუწყობს კომუნიკაციის გაუმჯობესებას ქართველ და უცხოელ ფსიქიატრებს შორის, ასევე საგანმანათლებლო და სამეცნიერო ერთობლივი პროექტების განხორციელებას.
