თბილისი, 24 აპრილი — Sputnik. ჯორჯიის შტატის (აშშ) საზოგადოებრივი უსაფრთხოების სასწავლო ცენტრის დელეგაცია საქართველოს შსს-ს მომსახურების სააგენტოს საქმიანობას გაეცნო, იუწყება შს სამინისტროს პრესსამსახური.
სტუმრები მართვის მოწმობის მისაღები თეორიული და პრაქტიკული გამოცდის ჩაბარების, ასევე, სახელმწიფო სანომრე ნიშნის დამზადების პროცესს გაეცნენ.
მომსახურების სააგენტოს თანამშრომლებმა ამერიკელ სტუმრებს ის ინოვაციური პროექტები წარუდგინეს, რომელთა განხორციელებაც უახლოეს პერიოდში იგეგმება.
ამერიკელებმა ქართველი სპეციალისტებისგან დეტალური ინფორმაცია მიიღეს იმ მომსახურების შესახებ, რომელსაც შს სამინისტროს მომსახურების სააგენტო ახორციელებს.
ვიზიტის ფარგლებში, დელეგაციის წევრები ცენტრალური კრიმინალური პოლიციის, საპატრულო პოლიციისა და კახეთის პოლიციის დეპარტამენტებში იმყოფებოდნენ.
