თბილისი, 21 აპრილი — Sputnik. საქართველოში 10 ათასი ლარის ღირებულების სხვადასხვა სახეობის უაქციზო სპირტიანი სასმელები ამოიღეს, აღნიშნულია ფინანსთა სამინისტროს საგამოძიებო სამსახურის განცხადებაში.
ამოღებულ პროდუქციას შორისაა „ნეფტის“, „ბელუგასა“ და „ფინლანდიას“ მარკის არაყი, ასევე კონიაკი „ჰენესი“ და ვისკი „ჯეკ დენიელსი“.
დაკავებულს 6-დან 8 წლამდე პატიმრობა ემუქრება. საუბარი ეხება მარკირებას დაქვემდებარებული განსაკუთრებით დიდი რაოდენობით აქციზური საქონლის გამოშვების, შენახვის, რეალიზაციის ან გადაზიდვის საკითხს.
წლის დასაწყისიდან ეს უაქციზო პროდუქციის რეალიზებასთან დაკავშირებული მეექვსე შემთხვევაა.
იანვარში საგამოძიებო სამსახურის თანამშრომლებმა რუსეთიდან საქართველოში უაქციზო თამბაქოს ნაწარმის შემოტანისთვის ერთი პირი დააკავეს. ანალოგიურ საქმეზე მოგვიანებით კიდევ ორი პირი მიეცა პასუხისგებაში.
თებერვლის თვეში სომხური კონიაკის უაქციზოდ შემოტანის მცდელობისთვის ოთხი ადამიანი იქნა დაკავებული.
ასევე თებერვალში უაქციზო სიგარეტის რეალიზების ბრალდებით საქართველოსა და სომხეთის მოქალაქეები დააკავეს.
მარტში საგამოძიებო სამსახურმა Marlboro-ს მარკის უაქციზო სიგარეტის რეალიზება აღკვეთა — დააკავეს ორი ადამიანი.
