თბილისი, 21 აპრილი — Sputnik. რუსეთის ჩრდილოეთ დედაქალაქში შოთა რუსთაველის 850 წლისთავისადმი მიძღვნილი საღამო გაიმართება, აცნობეს Sputnik-ს ორგანიზატორებმა.
ღონისძიება სანქტ-პეტერბურგის სახელმწიფო უნივერსიტეტის სააქტო დარბაზში ორგანიზაცია „სანქტ-პეტერბურგის ქართველთა ეროვნულ-კულტურული ავტონომია „ივერიის“ ინიციატივით 27 აპრილს გაიმართება.
საკუთარ შემოქმედებას სცენაზე წარმოადგენენ საცეკვაო ანსამბლები „სიხარული“, „საქართველო“ და „ივერია“, ასევე ვოკალურ-ინსტრუმენტული ანსამბლები „არაგვი“ და „სიხარული“.
ღონისძიებაში მონაწილეობას მიიღებენ სანქტ-პეტერბურგის სახელმწიფო უნივერსიტეტის აღმოსავლეთმცოდნეობის ფაკულტეტის ქართული ენის მასწავლებელი დიანა კიკნაძე, სანქტ-პეტერბურგის სახელმწიფო უნივერსიტეტის ფილოსოფიის ინსტიტუტის მაგისტრანტი რამინ ჯინჭარაძე და სახელმწიფო ერმიტაჟის მეცნიერ–თანამშრომელი იაროსლავა ბილინკინა.
„ბოლოს ასეთი იუბილე სანქტ-პეტერბურგში 1966 წელს აღინიშნა“, — განაცხადა ორგანიზაცია „სანქტ-პეტერბურგის ქართველთა ეროვნულ-კულტურული ავტონომია „ივერიის“ ახალგაზრდული განყოფილების ხელმძღვანელმა არჩილ ოძელმა.
საღამო 18:00 საათზე დაიწყება (უნივერსიტეტის სანაპირო, 7-9).
დასწრება თავისუფალია (პასპორტის წარდგენა აუცილებელია).
