თბილისი, 20 აპრილი — Sputnik. ლეგენდარული რუსული პოპ-ანსამბლი A’Studio საქართველოში სოლო–კონცერტით გამოვა, განუცხადეს Sputnik-ს ღონისძიების ორგანიზატორ კომპანიაში Conspiracy.
„ჯგუფი თბილისს 10 მაისს ეწვევა და დაუვიწყარ კონცერტს ჩაატარებს სახელმწიფო საკონცერტო დარბაზში (ფილარმონია)“, — განაცხადა კომპანია Conspiracy-ს პიარ-მენეჯერმა ანო დავითულიანმა.
A’Studio ქართულ სცენაზე შეასრულებს როგორც ახალ კომპოზიციებს, ისე ძველ ჰიტებს.
ყაზახურ-რუსული მუსიკალური პოპ-ჯგუფი A’Studio 1982 წელს ალმატში ყაზახმა მუსიკოსმა, ცნობილი საოპერო მომღერლის ერმეკ სერკებაევის შვილმა ბაიგალი სერკებაევმა შექმნა.
2000 წლამდე ჯგუფის ვოკალისტი და სახე ბატირხან შუკენოვი იყო. მის შემდეგ — პოლინა გრიფისი, ხოლო 2004 წლიდან — ქართველი ქეთა თოფურია.
ჯგუფი რომანტიკულ-საცეკვაო პოპ-როკს ასრულებს. A’Studio-ს ბოლო ჰიტებია Улетаю, S.O.S., Fashion Girl, Так же, как все და სხვა. A’Studio მრავალი მუსიკალური ჯილდოსა და პრემიის ლაურეატია.
