თბილისი, 15 აპრილი- Sputnik. 66 კგ-მდე წონით კატეგორიაში მოჭიდავე შმაგი ბოლქვაძე ბერძნულ-რომაული სტილის პირველი ქართველი მოჭიდავე გახდა, რომელმაც რიო-დე-ჟანეიროს ოლიმპიურ თამაშებზე ლიცენზია მოიპოვა.
ეს შესაძლებელი მას შემდეგ გახდა, როცა ბოლქვაძემ თავის წონით კატეგორიაში საერთაშორისო საკვალიფიკაციო ტურნირში გაიმარჯვა, რომელმაც სტარტი სერბეთის ქალაქ ზრენიანში აიღო. ფინალურ ორთაბრძოლაში ქართველმა მოჭიდავემ უნგრეთიდან ტამაშ ლერინცს მოუგო, იუწყება ტურნირის ოფიციალური ვებ-გვერდი.
ბოლქვაძის გარდა, შეჯიბრების პირველ დღეს ტატამზე კიდევ ორი ქართველი მოჭიდავე გამოვიდა. თუმცა, ვერცერთმა მათგანმა ლიცენზიის მოპოვება ვერ შეძლო. რევაზ ლაშხმა (-59 კგ) (ბერძნულ-რომაული სტილი) მეოთხედფინალში ნორვეგიელ სტიგ-ანდრე ბერგესტან წააგო, ზურაბ იაკობაშვილმა კი(თავისუფალი სტილი) (-65 კგ) მესამე ადგილისათვის ორთაბრძოლაში ბერძენ ნიკო არუზმანიდისთან წააგო.
ამჟამად საქართველოს მოჭიდავეთა ნაკრებს თავისუფალ სტილში ოთხი, ხოლო ბერნულ-რომაულ სტილში ერთი ოლიმპიური ლიცენზია გააჩნია. შეჯიბრებები სერბეთში 17 აპრილამდე გაგრძელდება.
