თბილისი, 14 აპრილი — Sputnik. საქართველოს პრემიერ–მინისტრი გიორგი კვირიკაშვილი პრეზიდენტ გიორგი მარგველაშვილს არჩევნების თარიღთან დაკავშირებულ განკარგულებაზე მოტივირებულ შენიშვნებს გაუგზავნის, რათა წინასაარჩევნო კამპანია 8 ივლისს დაიწყოს.
"რაც შეეხება თარიღს, ვინაიდან ამან გამოიწვია ფართო განსჯა, სხვადასხვა პარტიების მხრიდან და სამოქალაქო სექტორის მხრიდანაც გამოითქვა საყვედური, გვინდა ვთხოვოთ, რომ პრეზიდენტის ადმინისტრაციის მხრიდან დოკუმენტი წარმოდგენილი იყოს ისეთ დროს, რომლის გამოქვეყნებაც დაემთხვევა 8 ივლისს და 3 თვე იყოს აღებული წინასაარჩევნო ვადად“, — განაცხადა პრემიერ–მინისტრმა.
ამასთან ერთად, კვირიკაშვილის თქმით, არჩევნების თარიღი – 8 ოქტომბერი უცვლელი დარჩება.
პრემიერ–მინისტრს ავტორიტეტულმა არასამთავრობო ორგანიზაციებმა და ოპოზიციურმა პარტიებმა მოუწოდეს, არ მოაწეროს ხელი პრეზიდენტის განკარგულებას, ვინაიდან ეს საარჩევნო კოდექსს ეწინააღმდეგება.
