თბილისი, 10 აპრილი — Sputnik. ოდესის გუბერნატორი მიხეილ სააკაშვილი მიიჩნევს, რომ არსენი იაცენიუკის თანამდებობიდან გადადგომა თავისი გუნდის ბრძოლის პირველი შედეგია. ამასთან, ოლქის ხელმძღვანელი მომავალი მთავრობის გამო შეშფოთებულია.
ხანგრძლივი პოლიტიკური კრიზისის ფონზე კვირას უკრაინის პრემიერ-მინისტრმა არსენი იაცენიუკმა განაცხადა, რომ თანამდებობას ტოვებს და სამშაბათს განცხადებას რადაში დასამტკიცებლად შეიტანს. იაცენიუკის განცხადებით, პრემიერის ფრაქცია „სახალხო ფრონტი“ საპარლამენტო კოალიციაში რჩება.
„უკრაინის პრეზიდენტს ვხვდებოდი, როდესაც მას იაცენიუკის გადადგომის შესახებ განცხადება შეუტანეს. ჩვენმა ბრძოლამ პირველი შედეგი გამოიღო, მაგრამ, სიმართლე რომ ვთქვა, შეშფოთებისთვის საფუძველი საკმარისზე მეტი მაქვს — ბოლო დღეებში კულისებს მიღმა შეთანხმებების ფონზე“, — დაწერა სააკაშვილმა Facebook-ის გვერდზე.
სააკაშვილმა მანამდე იაცენიუკი არაერთხელ გააკრიტიკა.
უკრაინის რადამ 16 თებერვალს მინისტრთა კაბინეტის გადაყენება ვერ შეძლო, რამაც სამთავრობო კოალიციის დაშლა გამოიწვია. ამან უკრაინაში პოლიტიკური კრიზისის პროვოცირება გამოიწვია, რადგანაც დეპუტატები ამჟამინდელ პრემიერთან მუშაობაზე უარს აცხადებდნენ, მაგრამ მისი გადადგომის თაობაზე საკითხის განხილვა, კანონით, სექტემბერზე ადრე არ შეიძლებოდა.
საპარლამენტო ფრაქციები ახალი კოალიციის ჩამოყალიბებაზე კონსულტაციებს მართავენ.
ახალი პრემიერის თანამდებობაზე ძირითად კანდიდატად რადის სპიკერი ვლადიმირ გროისმანი სახელდება.
