თბილისი, 7 აპრილი — Sputnik. „ლეიბორისტული პარტიის“ ლიდერი შალვა ნათელაშვილი მიიჩნევს, რომ საქართველოს ხელისუფლება საპარლამენტო არჩევნების მასობრივი გაყალბებისთვის ემზადება.
პრეზიდენტის განკარგულება, რომლის თანახმად საქართველოში საპარლამენტო არჩევნები 2016 წლის 8 ოქტომბერს ჩატარდება, დასამტკიცებლად მთავრობაშია გაგზავნილი. ორივე განკარგულება 8 აგვისტოს ამოქმედდება და მაშინ უნდა დაიწყოს წინასაარჩევნო რბოლა.
„პრეზიდენტმა არ გაიარა კონსულტაციები პოლიტიკურ სპექტრთან; პრეზიდენტმა ამ ბრძანებულებით ჩაკეტა საარჩევნო კანონმდებლობის განახლების პერსპექტივა; პრეზიდენტმა არჩევნების პერიოდად შეარჩია პოლიტიკურად სრულიად ჩამკვდარი სეზონი“, — განაცხადა ნათელაშვილმა პრესკონფერენციაზე.
„მოვითხოვთ, არჩევნები ჩატარდეს 2016 წლის 30 ოქტომბერს, რათა პარტიებმა შეძლონ სრულფასოვანი დებატების ჩატარება, რათა პარტიებმა მოასწრონ შეხვედრების გამართვა მოსახლეობასთან მთელი ქვეყნის მასშტაბით, რომ მოსახლეობამ გადაწყვეტილების მიღება ცივი გონებით შეძლოს“, — აღნიშნა ნათელაშვილმა.
გასული საპარლამენტო არჩევნები 2012 წელს გაიმართა.
