თბილისი, 1 აპრილი — Sputnik. ბირთვული მრეწველობის სამიტზე (Nuclear Industry Summit – 2016) ვაშინგტონში საქართველოს პრეზიდენტს გიორგი მარგველაშვილს გადაეცა ჯილდო „ატომები მშვიდობისათვის“ იმ წვლილისთვის, რომელიც ქვეყანამ ბირთვულ უსაფრთხოებაში შეიტანა.
საქართველომ ეს ჯილდო მაღალგამდიდრებული ურანის რეპატრიაციის ინიციატივისთვის მიიღო. მაღალგამდიდრებული ურანის რეპატრიაციით ქვეყანამ აღასრულა 2014 წლის ბირთვული უსაფრთხოების სამიტის კომუნიკეში გათალისწინებული შეთანხმება, შეამციროს საკუთარ ტერიტორიაზე მაღალგამდიდრებული ურანის მარაგი. ეს ჯილდო სულ 17-მა სახელმწიფომ მიიღო.
„შედეგად საქართველომ ბირთვული თვალსაზრისით თავისუფალი სახელმწიფოს სტატუსი მოიპოვა“, — აღნიშნულია საქართველოს გარემოს დაცვისა და ბუნებრივი რესურსების სამინისტროს პრეს-რელიზში.
ბირთვული მრეწველობის სამიტი ოფიციალური ღონისძიებაა, რომელიც ბირთვული უსაფრთხოების სამიტის პარალელურად მიმდინარეობს. მასზე განიხილავენ ისეთ საკითხებს, როგორებიცაა რადიოლოგიური და სტრატეგიული ბირთვული მასალების გამოყენება, მათი შენახვა და ტრანსპორტირება, ასევე კიბერ-უსაფრთხოებასთან დაკავშირებული საკითხები.
ღონისძიებაში, რომელიც 30 მარტიდან 1 აპრილის ჩათვლით პერიოდში გაიმართა, 40-ზე მეტი ქვეყნის წარმომადგენლები მონაწილეობდნენ.
