თბილისი, 1 აპრილი — Sputnik. ქართულმა მხარემ ზეპირი ფორმით დაგვარწმუნა, რომ რუსული დელეგაცია სრული შემადგენლობით შეძლებს შევიდეს ქვეყანაში ეუთოს საპარლამენტო ასამბლეის მორიგ სესიაზე დასასწრებად, განუცხადა ჟურნალისტებს რუსეთის ფედერაციის დელეგაციის ხელმძღვანელის მოადგილემ, ასამბლეის სპეციალურმა წარმომადგენელმა ტერორიზმთან ბრძოლის საკითხებში ნიკოლაი კოვალიოვმა.
ეუთოს საპარლამენტო ასამბლეის საზაფხულო სესია 2016 წლის ივლისში თბილისში გაიმართება.
2015 წლის ზაფხულში ფინეთმა უარი თქვა შეეშვა საკუთარ ტერიტორიაზე სანქციების ქვეშ მყოფი რუსი დეპუტატები, მათ შორის სახელმწიფო დუმის სპიკერი სერგეი ნარიშკინი ეუთოს საპარლამენტო ასამბლეაში მონაწილეობის მისაღებად. ამ ნაბიჯის საპასუხოდ, რუსეთის დელეგაციამ სრული შემადგენლობით უარი თქვა ჰელსინკში გამგზავრებაზე.
„მიუხედავად იმისა, რომ საქართველო არჩევნებისთვის ემზადება და ანტირუსულ რიტორიკას აქვს ადგილი, რაც შეეხება საპარლამენტო ასამბლეის მუშაობას, საქართველომ დაგვიდასტურა, რომ არანაირი წინააღმდეგობა არ იქნება და რომ რუსეთის დელეგაცია სრული შემადგენლობით იქნება დაშვებული. ჩვენ, რა თქმა უნდა, წერილობითი გარანტიები გვინდა, რასაც დაგვპირდნენ, მაგრამ ჯერ არ გვაქვს“, — უთხრა კოვალიოვმა ჟურნალისტებს.
მისი თქმით, რუსულმა მხარემ ეუთოს საპარლამენტო ასამბლეაში ქართული დელეგაციის ხელმძღვანელისგან ზეპირი დადასტურება მიიღო, რომ არ იქნება ისეთი გართულებები, რასაც ადგილი ჰქონდა ფინეთში.
