თბილისი, 31 მარტი — Sputnik. კომპანია „თელასმა“ დაბა კოჯრის ენერგომომარაგების გაუმჯობესების მიზნით ქვესადგურ „კოჯრის“ სარეაბილიტაციო სამუშაოები დაასრულა, განაცხადეს კომპანიაში.
ქვესადგურში ძალოვანი ტრანსფორმატორის (T-2) და 35-კილოვოლტიანი ზეთიანი ამომრთველის (BT-35) სარეაბილიტაციო სამუშაოები ჩატარდა, რის შედეგადაც ქვესადგურის სიმძლავრე 4 მეგავატით გაიზარდა და გაუმჯობესდა დაბა კოჯრის 1437 აბონენტის ელექტრომომარაგების ხარისხი და საიმედოობა.
აღნიშნული სამუშაოების ჩატარება განსაკუთრებით აქტუალურია დაბა კოჯრის ინფრასტრუქტურის განვითარების, საკურორტო სეზონის მოახლოებისა და ელექტროენერგიაზე მზარდი მოთხოვნილების პირობებში.
სს „თელასი“ერთ-ერთი მსხვილი კომპანიაა საქართველოში ელექტროენერგიის დისტრიბუციის დარგში, რომელიც ახორციელებს ელექტროენერგიის განაწილებას თბილისში. კომპანია ელექტროენერგიას აწვდის 500 ათასზე მეტ მომხმარებელს. 2003 წლის აგვისტოში სს „თელასი“ „ინტერ რაოს“ შემადგენლობაში შევიდა. „ინტერ რაოს“ მფლობელობაშია „თელასის“ აქციათა 75%, ხოლო 25%-მდე სახელმწიფოს საკუთრებაა.
