თბილისი, 30 მარტი — Sputnik. საქართველოს საჯარო სკოლებში მომავალი სასწავლო წლიდან სწავლა 15 სექტემბერს დაიწყება, განაცხადა საქართველოს განათლებისა და მეცნიერების მინისტრის მოადგილემ ლია გიგაურმა.
აქამდე სწავლა სკოლებში 10 სექტემბრის მომდევნო პირველ ორშაბათს იწყებოდა.
„ჩვენ გამოვედით ინიციატივით, რომ სწავლა ფიქსირებული თარიღით იწყებოდეს, რომ მშობლებს დასვენებისა და არდადაგების დაგეგმვა შეეძლოთ. ამ ცვლილების თაობაზე მინისტრის ბრძანება უკვე გამოიცა“,- უწყების ვებ-გვერდზე გამოქვეყნებულ ბრიფინგზე განაცხადა გიგაურმა.
კერძო სკოლების ხელმძღვანელობა თვითონ გადაწყვეტს, როდის დაიწყოს სასწავლო პროცესი.
ამ წელს საქართველოს საჯარო და კერძო სკოლები 49 ათასზე მეტ პირველკლასელს მიიღებენ.
