თბილისი, 26 მარტი — Sputnik. სამების საკათედრო ტაძარში სარეაბილიტაციო სამუშაოები, ზარალის მოცულობის დადგენის შემდეგ, დედაქალაქის ბიუჯეტიდან დაფინანსდება, განაცხადეს საქართველოს ფინანსთა სამინისტროში.
ხანძარი სამების ტაძარში 20 მარტს გაჩნდა. სახანძრო ბრიგადები ოთხ საათზე მეტხანს აქრობდნენ ცეცხლს, მუშაობაში მათ ხელს უშლიდა ქარი და ის, რომ ხანძრის კერა ძნელად მისადგომია.
პრემიერ-მინისტრის გიორგი კვირიკაშვილის დავალებით, შაბათს სამების საკათედრო ტაძრის ახალგაზრდულ ცენტრში ხანძრის შედეგად დამწვარი სტამბა ფინანსთა მინისტრმა ნოდარ ხადურმა და თბილისი მერმა დავით ნარმანიამ დაათვალიერეს.
„როგორც აღინიშნა, ზარალის მოცულობის დადგენის შემდეგ, სარეაბილიტაციო სამუშაოები დედაქალაქის ბიუჯეტიდან დაფინანსდება, თუმცა ფინანსთა სამინისტრო გამოთქვამს მზადყოფნას, საჭიროების შემთხვევაში, შესაბამისი თანხები გამოიყოს სახელმწიფო ბიუჯეტიდან“, — განაცხადეს ფინანსთა სამინისტროში.
მიიღეს გადაწყვეტილება, რომ შეიქმნება სამუშაო ჯგუფი, რომელიც ხანძრის შედეგად მიყენებული ზარალის ოდენობას შეისწავლის და წარადგენს შესაბამის ხარჯთაღრიცხვას დაზიანებული ტერიტორიის რეაბილიტაციისთვის.
„თბილსერვის ჯგუფმა“ აღნიშნული ტერიტორიის დასუფთავება უკვე დაასრულა.
ცეცხლის გაჩენის დროს სამებაში ბევრი ადამიანი იმყოფებოდა, თუმცა მათი ევაკუაცია დროულად მოხერხდა.
