თბილისი, 24 მარტი — Sputnik. გალში ინციდენტების პრევენციისა და მათზე რეაგირების მექანიზმის ჯგუფის მუშაობის აღდგენა რიგი ჰუმანიტარული საკითხების მოგვარებას დაეხმარება, მიიჩნევს ექსპერტი კავკასიის საკითხებში მამუკა არეშიძე.
გადაწყვეტილება გალში ინციდენტების პრევენციისა და მათზე რეაგირების მექანიზმის ჯგუფის მუშაობის აღდგენის შესახებ ჟენევის მოლაპარაკებების 35-ე რაუნდზე მიიღეს. მოლაპარაკებები ოთხი წლის განმავლობაში შეწყვეტილი იყო.
„ეს ძალზე მნიშვნელოვანი გადაწყვეტილებაა. თუ ოსებთან ამგვარ შეხვედრებს გადავხედავთ, ძალზე ბევრი ჰუმანიტარული ხასიათის საკითხი წყდება ამ შეხვედრებზე. იქ, როგორც წესი, ჰუმანიტარული საკითხები წყდება და არა პოლიტიკური“, — განუცხადა არეშიძემ Sputnik-ს.
მაგალითად, ინციდენტების პრევენციისა და მათზე რეაგირების მექანიზმის ჯგუფის შეხვედრები გალში აფხაზეთის ენერგომომარაგებასთან დაკავშირებული პრობლემების მოგვარებას დაეხმარება, აღნიშნა ექსპერტმა.
ენგურის წყალსაცავში წყლის შემცირების გამო მიმდინარე წლის 25 იანვრიდან აფხაზეთის მოსახლეობას პრობლემები შეექმნა. ენგურჰესის კაშხალი ქართული მხარის მიერ კონტროლირებად ტერიტორიაზეა, მართვის პულტი — აფხაზურ მხარეზე.
