თბილისი, 17 მარტი — Sputnik. საქართველოს პრემიერ–მინისტრი გიორგი კვირიკაშვილი შაბათს ინტერპარტიული ჯგუფის წარმომადგენლებს შეხვდება, რომლებიც საარჩევნო კოდექსში ცვლილებების შეტანას მოითხოვენ, იუწყება პარტია „თავისუფალი დემოკრატების“ პრეს-სამსახური.
იანვარში გამართულ პირველ შეხვედრაზე კვირიკაშვილი და არასაპარლამენტო ოპოზიცია საარჩევნო სისტემაზე მომუშავე ჯგუფის ჩამოყალიბებაზე შეთანხმდნენ. ოპოზიცია 2016 წლის არჩევნებისთვის მაჟორიტარული სისტემის გაუქმებას მოითხოვს, თუმცა ხელისუფლება აცხადებს, რომ ასეთი ცვლილებებისთვის მხოლოდ 2020 წლისთვის იქნებიან მზად.
„აღნიშნული შეხვედრა, პრაქტიკულად, ბოლო შანსი იქნება, რათა ხელისუფლებისა და ოპოზიციის ურთიერთობები ცივილიზებულ ჩარჩოებში წარიმართოს, რათა შევძლოთ თავიდან ავირიდოთ დესტაბილიზაცია როგორც წინასაარჩევნო, ისე არჩევნებისშემდგომ პერიოდში“, — აღნიშნულია განცხადებაში.
ამჟამად საქართველოში შერეული საარჩევნო სისტემა მოქმედებს – პარლამენტი 77 პროპორციული სისტემით არჩეული და 73 მაჟორიტარი დეპუტატისგან შედგება.
