თბილისი, 14 მარტი — Sputnik. ანკარაში მომხდარი ტერორისტული აქტის შემდეგ თურქეთის პრეზიდენტმა რეჯეფ თაიიფ ერდოღანმა წერილობითი განცხადება გააკეთა, რომელშიც ნათქვამია, რომ გაძლიერდება ტერორიზმის წინააღმდეგ თურქეთის ბრძოლის ძალისხმევა.
„ვგმობ ანკარაში 13 მარტს მომხდარ ტერაქტს. თანაგრძნობას ვუცხადებ დაღუპულთა ოჯახებს და გამოჯანმრთელებას ვუსურვებ დაჭრილებს. რეგიონში არასტაბილურობის გამო ბოლო წლებში თურქეთი ტერორისტთა სამიზნედ იქცა. ტერორისტულმა ორგანიზაციებმა და მათ, ვინც ამ ორგანიზაციებს იყენებს, სამიზნედ აირჩიეს ჩვენი მოქალაქეები და ყველაზე უსინდისო და არამზადულ გზას იყენებენ. ჩვენი განზრახვა, ვებრძოლოთ ტერორიზმს, კიდევ უფრო გაძლიერდება. ეს ბრძოლა წარმატებით დაგვირგვინდება და ტერორისტებს დავაჩოქებთ“, — ნათქვამია განცხადებაში რომელიც პრეზიდენტის ოფიციალურ გვერდზეა განთავსებული.
ანკარაში მომხდარი ტერორისტული აქტის შედეგად 34 ადამიანი დაიღუპა ხოლო კიდევ 125 დაიჭრა, მათგან 19 მძიმე მდგომარეობაშია.
დანაღმული ავტომანქანა ადგილობრივი დროით 18:45 საათზე აფეთქდა ავტობუსის გაჩერებაზე თურქეთის პრემიერ-მინისტრის ერთ-ერთ ოფისთან ახლოს, დედაქალაქის ცენტრში, იმ დროს, როცა ავტობუსის გაჩერებაზე ხალხმრავლობა იყო.
