თბილისი, 7 მარტი — Sputnik. საქართველოს საგარეო საქმეთა მინისტრმა და აზერბაიჯანის პრეზიდენტმა ილჰამ ალიევმა ორი ქვეყნის ურთიერთობის აქტუალური საკითხები და სხვადასხვა სფეროში თანამშრომლობის გაღრმავების შესაძლებლობები განიხილეს.
განსაკუთრებული ყურადღება გამახვილდა ეკონომიკურ სფეროში თანამშრომლობის არსებულ მზარდ პოტენციალზე და აგრეთვე ხაზი გაუსვეს ორი ქვეყნის მნიშვნელობას საერთაშორისო ენერგეტიკული და სატრანზიტო პროექტების რეალიზაციის თვალსაზრისით, — ნათქვამია საგარეო საქმეთა სამინისტროს პრესსამსახურის განცხადებაში.
განსაკუთრებით აღინიშნა ბაქო-სუფსის პროექტის ინაუგურაციის 20 წლისთავი, რომელიც წელს აღინიშნება. მხარეებმა კიდევ ერთხელ დადასტურეს ამ პროექტის მნიშვნელობა, რომელმაც საფუძველი დაუდო ორი ქვეყნის ურთიერთობის კიდევ უფრო განმტკიცებას და მათ ჩართულობას გლობალურ პროექტებში.
მიხეილ ჯანელიძე, აზერბაიჯანში ვიზიტის ფარგლებში, შეხვედრებს გამართავს ქვეყნის პრემიერ-მინისტრ არტურ რას–ზადესთან, მილი მეჯლისის თავმჯდომარე ოქტაი ასადოვთან და საგარეო საქმეთა მინისტრ ელმარ მამედიაროვთან.
