თბილისი, 7 მარტი — Sputnik. უახლოეს პერიოდში EBRD (ევროპის რეკონსტრუქციისა და განვითარების ბანკი) ორი პროგრამის დაფინანსების საკითხზე იმსჯელებს — თბილისის ავტობუსების პარკის განახლებასა და მყარი ნარჩენების მართვაზე, იუწყება საქართველოს ფინანსთა სამინისტრო.
EBRD-ის მეშვეობით განხორციელებული პროექტები და მომავალი თანამშრომლობის პერსპექტივები ორშაბათს საქართველოს ფინანსთა მინისტრ ნოდარ ხადურისა და EBRD-ის წარმომადგენლებს შორის შეხვედრაზე განიხილეს.
ევროპის რეკონსტრუქციისა და განვითარების ბანკი საქართველოს საიმედო პარტნიორია არა მხოლოდ ფინანსური თანამშრომლობის, არამედ ევროპასთან ურთიერთობის გაღრმავებისა და ევროპული ინვესტიციების მოზიდვის მიმართულებით, აღნიშნა ხადურმა.
EBRD-ის დაფინანსებით საქართველოში მნიშვნელოვანი პროექტები ხორციელდება ენერგეტიკის სფეროში, მუნიციპალურ ინფრასტრუქტურაში. ბანკი ასევე აქტიურად თანამშრომლობს კერძო სექტორთან.
საქართველოსა და ევროპის რეკონსტრუქციისა და განვითარების ბანკს შორის თანამშრომლობის შედეგად, 2014 წელს პრაქტიკულად გაორმაგდა EBRD-ის მიერ საქართველოს ეკონომიკაში განხორციელებული ინვესტიციები, რომელმაც 200 მილიონ ევროს გადააჭარბა, ხოლო მთლიანად თანამშრომლობის 23 წლის განმავლობაში, ბანკის ინვესტიციებმა ქვეყნის ეკონომიკაში დაახლოებით 2.6 მილიარდი ევრო შეადგინა.
