თბილისი, 3 მარტი — Sputnik. საქართველოს ნაკრებისა და დნეპროპეტროვსკის „დნეპრის“ ნახევარმცველი ალექსანდრე კობახიძე უკრაინის ჩემპიონატის მატჩებზე გუნდის შემადგენლობის განაცხადშია შეყვანილი, იუწყება კლუბის ოფიციალური ვებ-გვერდი.
29 წლის ფეხბურთელი „დნეპრში“ თბილისის „დინამოდან“ 2008 წლის იანვარში გადავიდა. ამ დროის განმავლობაში კობახიძემ გუნდის შემადგენლობაში მხოლოდ 12-ჯერ ითამაშა (8 — პრემიერ-ლიგაში, 3 — უეფას ევროპის ლიგზე, 1 — უკრაინის თასზე) და ორი გოლი გაიტანა.
დანარჩენი დროის განმავლობაში ნახევარმცველი იჯარით იმყოფებოდა უკრაინის სხვადასხვა კლუბებში – „კრივბასში“ (კრივოი როგი), „არსენალში“ (კიევი) და „ვოლინში“ (ლუცკი).
კობახიძე სეზონისწინა შეკრებაზე „დნეპრთან“ ერთად თურქეთში იმყოფებოდა, სადაც ის გუნდის მთავარმა მწვრთნელმა მირონ მარკოვიჩმა მიიწვია. ბოლო ტესტ-მატჩში ფეხბურთელმა ტრავმა მიიღო, სამშობლოში დაბრუნდა და მკურნალობის კურსი გაიარა.
„დნეპრის“ შემადგენლობაში ქართველი ნახევარმცველი მე-19 ნომრით გამოვა.
უკრაინის ჩემპიონატის მეორე წრე 5 მარტს იწყება. ზამთრის შესვენების შემდეგ პირველ გასვლით მატჩს „დნეპრი“ კიევის „დინამოსთან“ გამართავს.
ჩემპიონატის პირველი ნახევრის შემდეგ „დნეპრს“ აქტივში 28 ქულით მეოთხე ადგილი უკავია. პირველობის ლიდერის „შახტიორისგან“ გუნდი 15 ქულით ჩამორჩება.
