თბილისი, 3 მარტი — Sputnik. საქართველოს პარლამენტმა საქართველოს ეროვნული ბანკის (სებ) საბჭოში კობა გვენეტაძის შეყვანით მხარი დაუჭირა ქვეყნის მონეტარულ სტაბილურობასა და ეროვნული ბანკის დამოუკიდებლობას, განაცხადა პრეზიდენტის ადმინისტრაციის ხელმძღვანელმა გიორგი აბაშიშვილმა.
„პარლამენტმა ნდობა გამოუცხადა და ამ გადაწყვეტილებით მხარი დაუჭირა ეროვნული ბანკის დამოუკიდებლობას. პარლამენტმა მხარი დაუჭირა ქვეყნის მონეტარულ სტაბილურობას გამომდინარე იქიდან, რომ ეროვნული ბანკის წარმატებით ფუნქციონირება საბჭოს წარმატებულ წევრებზეა დამოკიდებული", — თქვა აბაშიშვილმა.
„სამწუხაროდ, კობა გვენეტაძეს მხარი არ დაუჭირა "ნაციონალური მოძრაობის" არც ერთმა წევრმა. ეს კიდევ ერთხელ აჩვენებს ამ პარტიის სახეს, რომელმაც გადაწყვეტილება მიიღო არა სახელმწიფოებრივი ინტერესებიდან გამომდინარე, არამედ ვიწრო პარტიული ინტერესებიდან. მათთვის გაცილებით მნიშვნელოვანია საკუთარი პარტია, ვიდრე ქვეყნის ეკონომიკა და დამოუკიდებელი ეროვნული ბანკი“, — დაამატა აბაშიშვილმა.
პარლამენტმა ეროვნული ბანკის საბჭოს წევრად, ექსპერტებთან და არასამთავრობო ორგანიზაციებთან ორთვიანი კონსულტაციების შემდეგ, პრეზიდენტის მიერ წარდგენილი კანდიდატურა კობა გვენეტაძე დაამტკიცა. მას მხარი 81-მა დეპუტატმა დაუჭირა. უმთავრესი კრიტერიუმი, რომლითაც გვენეტაძე შეირჩა, კანდიდატის პროფესიონალიზმი და უპარტიობა იყო.
