თბილისი, 26 თებერვალი — Sputnik. საერთაშორისო ფონდ „კურაციო“-ს წარმომადგენელმა, ჯანდაცვის საკითხების ექსპერტმა კაკი ზოიძემ განაცხადა, რომ საქართველოში ელექტრონული რეცეპტების სისტემის შემოღება საშუალებას მოგვცემს განვსაზღვროთ, ექიმების მიერ გაცემული დანიშნულებები რამდენად რაციონალურია. ბოლო ორი წელია პაციენტებს, რომლებსაც ესაჭიროებათ ფსიქოტროპული წამლები, ონლაინ რეცეპტების დახმარებით შეუძლიათ მათი შეძენა. საქართველოს შრომის, ჯანდაცვისა და სოციალური დაცვის მინისტრის დავით სერგეენკოს თქმით, უახლოეს მომავალში ეს სერვისი ყველა მედიკამენტძე გავრცელდება.
„ეს სისტემა მოგვცემს საშუალებას ერთის მხრივ გაკონტროლდეს რამდენი და რა პრეპერატები ენიშნებათ პაციენტებს…მეორეს მხრივ-საყოველთაო ჯანდაცვის პროგრამის ფარგლებში სახელმწიფო შეძლებს წამლების სუბსიდირებას“, — განაცხადა ზოიძემ.
მისი სიტყვებით, წამლების სუბსიდირების ქვეშ საყოველთაო დაზღვევის პაკეტში მედიკამენტების შეტანა იგულისხმება.
„საყოველთაო დაზღვევის პაკეტში დღეს ამბულატორული და სტაციონალური მომსახურება შედის და ქრონიკულ დაავადებათა მქონე ავადმყოფთათვის ამბულატორული მედიკამენტები ამ პაკეტის ნაწილი შეიძლება გახდეს. უპირველეს ყოვლისა, აუცილებელია, რომ ეს სოციალურად დაუცველთათვის შემოიღონ“,-აღნიშნა ექსპერტმა.
ელექტრონული რეცეპტების სისტემის შემოღების შემდეგ, პაციენტის გასინჯვის შემდგომ ექიმი მონაცემთა ბაზაში დანიშნულებას ჩატვირთავს. რეცეპტი წერილობითი სახით პაციენტს არ დასჭირდება, საქმარისი იქნება იქონიოს პირადობის მოწმობა, რათა საჭირო წამალი მიიღოს აფთიაქში.
