თბილისი, 24 თებერვალი — Sputnik. მადრიდის „რეალისა“ და ესპანეთის ნაკრების ყოფილი მცველის ფერნანდო იეროს უფროსი ძმა მანოლო იეირო კლუბ“საბურთალოს“ სპორტული დირექტორი იქნება, ნათქვამია კლუბის ვებგვერდზე.
ქართულ კლუბსა და ესპანელ სპეციალისტს შორის დადებული ხელშეკრულება ძალაში პირველი მარტიდან შევა. ამ დღეს გაიმართება პრესკონფერენცია, რომელზეც ახალი დირექტორის რანგში უფროსი იეროს წარდგენა ოფიციალურად მოხდება.
გასული წლის ოქტომბერში იერო თბილისში „საბურთალოს“ გენერალური დირექტორის კახა ჭუმბურიძის მიწვევით იმყოფებოდა. ორდღიანი ვიზიტის ფარგლებში იერო ინფრასტრუქტურას, კლუბის მუშაობას და გუნდის განვითარების გეგმებს გაეცნო.
მანოლო იერო, როგორც მისი ძმა ფერნანდო, ყოფილი ფეხბურთელია. საფეხბურთო კარიერის ნაწილი მან „მალაგესა“ და „ტენერიფეში“ გაატარა. აქტიური ფეხბურთელის კარიერის დასრულების შემდეგ მანოლო „მალაგის“ სპორტული დირექტორი გახდა, ოდნავ მოგვიანებით კი გუნდის მთავარი მწვრთნელი.
