თბილისი, 22 თებერვალი — Sputnik. საქართველოს პარლამენტის თავმჯდომარე დავით უსუფაშვილი, სამუშაო ვიზიტის ფარგლებში, იაპონიის მრჩეველთა პალატის სპიკერ მასააკი იამაზაკის (Masaaki Yamazaki) შეხვდა.
საპარლამენტო დელეგაცია ტოკიოში 21 თებრვალს გაემგზავრა. ვიზიტის ფარგლებში ქართველი პარლამენტარები იაპონიის საკანონმდებლო და აღმასრულებელი ხელისუფლების წარმომადგენლებს შეხვდებიან.
„ბატონმა სპიკერმა დეტალურად ისაუბრა იმის შესახებ, თუ რა დადებით ტენდენციას ხედავს საქართველოსთან ურთიერთობის შემთხვევაში. საქართველო, როგორც აზიისა და ევროპის დამაკავშირებელი რგოლი, როგორც დერეფანი, იაპონიისათვის ძალზე მნიშვნელოვანია“, — ციტირებს უსუფაშვილს პარლამენტის პრესსამსახური.
საქართველოს პარლამენტის თავმჯდომარე დავით უსუფაშვილი ასევე შეხვედრას გამართავს იაპონიის ქვედა (წარმომადგენელთა) პალატის თავმჯდომარესთან, ტადამორი ოშიმასთან (Tadamori Oshima).
ქართული დელეგაციის შემადგენლობაში დიმიტრი ხუნდაძე, შოთა ხაბარელი და ზურაბ აბაშიძე შედიან. ვიზიტი იაპონიაში 24 თებერვალს დასრულდება.
